Паміраючы ад смеху, тут падаўжаюць жыццё: у Малых Аўцюках стартаваў Рэспубліканскі фестываль народнага гумару “Аўцюкі-2023”

Людскі паток пацёк на галоўную плошчу Малых Аўцюкоў, дзе разгарнуліся стылізаваныя падворкі. Па добрай традыцыі патрапіць туды можна толькі праз мытню. Замест пошліны — добры настрой і востры жарт. Муж і жонка Стрыжэўскія прайшлі яе на выдатна. Вольга і Іван прыехалі на фестываль з Гомеля. У мінулы раз свята гумару ім спадабалася. Сёння спадзяюцца на форуме правесці цэлы дзень.

Людзей становіцца ўсё больш. Шчасліўчыкі, якія разлічыліся з мясцовай мытняй, адразу трапляюць на вуліцу з разнастайнымі лакацыямі. Тут можна пазнаёміцца з творчасцю жыхароў сельсаветаў, убачыць разнастайныя выставы, паўдзельнічаць у арыгінальнай латарэі і дэгустацыі самагону «Аўцюкоўскія бульбулятары». Для шапаголікаў сапраўдны рай: народныя рамеснікі прыгожа аформілі вітрыны з вышыванкамі, разнастайнымі вырабамі з дрэва, саломкі, каменя, гліны.

Радасць сустрэчы з гасціннымі людзьмі ва ўтульным кутку беларускага Палесся падзяліў намеснік старшыні Гомельскага аблвыканкама Дзмітрый Алейнікаў:

— Самы пазітыўны форум Беларусi дае магчымасць усім жадаючым дакрануцца да жамчужын народнага гумару. Цяжка ўявіць наша жыццё без добрага жарту, вясёлай прыпеўкі. І кожны з нас у пэўнай ступені носьбіт гэтай традыцыйнай культуры. Унікальнасць аўцюкоўцаў у тым, што яны залучаюць у гэты круг велізарную колькасць удзельнікаў. Бо ўсмешка і смех — тая сіла, якая аб’ядноўвае людзей, робіць іх больш шчырымі.

Пад апладысменты яму ўручылі званне ганаровага аўцюкоўца. Цырымонію пасвячэння прайшла і начальнік упраўлення культуры і народнай творчасці Міністэрства культуры Ірына Карповіч, якая падкрэсліла, што на фестывалі ўпершыню, але ўжо паспела ўбачыць, што гэта асаблівае свята.

— І калі сёння ў кагосьці выступяць слёзы, то толькі ад смеху, — дадала яна.

Пасля яркага адкрыцця фестывалю стартавала конкурсная праграма. За званне самых крэатыўных і гумарных на гэты раз спаборнічаюць 6 творчых калектываў з розных рэгіёнаў Беларусі.

Увечары на галоўнай сцэне адбудзецца канцэртная праграмма з ўдзелам Заслужанага калектыву Беларусi «Песняры», а таксама танцавальна-забаўляльная праграма “КаверХорШоу”. Феерверк стане выдатным завяршэннем свята.